ما كذبت امي علي... يوم قالت ...

ماكذبت أمي عليّ .. يوم قالت ..
ياحبيبي ...
لاتنام إلا متوضي ...
وصل .. لله ركعتين ..
واقرالك لو آيتين ..
وارفع يديك وتضرع .. بالدعاء ..
يشرق النور بجبينك ..
ماتجيك أحلام توحش ..
وماتقوم الصبح ..
مهموم .. وحزين ..

ماكذبت أمي عليّ ..

يوم قالت ..
ياحبيبي ...
لاتفرط في صلاتك ..
ولايغرك حب ذاتك ..
ولايبل الريق مسكر ..
حتى لو يبست لهاتك ..
ياحبيبي ..
إحرص .. تصلى وتقرا..
وكل ساعه ..
راقب الله في حياتك ..



ماكذبت أمي عليّ ..

يوم قالت ..
ياحبيبي ...
لاتصير إنسان جارح ..
إضحك بوجه الجميع ..
عامل الناس بتسامح ..
لاتفرط في حقوقك ...
لاتجامل في النصائح ..
ولاتثور .. تصير فاضح ..
وإن لمست عيب صاحب ..
لاتنافق .. ولاتصارح ..
وإنتبه من هالنصيحه ..
لاتصير إنسان غامض ..
ولاتصير إنسان واضح ..

ماكذبت أمي عليّ ..

يوم قالت .. ياحبيبي ...
إحذر .. أولادك ومالك ..
لاتجافيهم وتقسى ..
ولاتبالغ في دلالك ..
ربهم بالخير .. تربح
وعلم النفس القناعه ..
وعلم القلب الشجاعه ..
ولاتغطي العين وتحلم
وتخدع الرآي بخيالك ..


ماكذبت أمي عليّ ..

يوم قالت .. ياحبيبي ...
إن وعدتَ وعد .. فاصدق
إحذر تزل بلسانك ..
أو تقلل يوم شانك ..
عش عزيز النفس تسلم ..
حاجتك للناس .. علقم ..
لاتبين ضعف حالك ..
أو يغرك زود مالك ..
ولاتهين إنسان .. تندم ..



ماكذبت أمي عليّ ..

يوم قالت .. ياحبيبي...
خلك إنسان بكرامه ..
لاتغرك هالأمور ..
المناصب ..
والقصور ..
فكَّر بيوم القيامه ..
فكَّر إنك ماأنت خالد ..
رحلة الدنيا قصيره ..
تلقى نفسك في سلامه ..



ماكذبت أمي عليّ ..

يوم قالت .. ياحبيبي ...
إحذر تصير البخيل ..
واحذر تبذر وتطّغى
واحذر تعيش بخساسه ..
أو ذليل ..
ولاتنام بيوم خالي ..
لاتنام بدون لاتفعل جميل ..
تلقى نفسك في معزه ..
تلقى روحك في شموخ ..
ياجنيني ..
عش أصيل ....
ومت أصيل ..


ماكذبت أمي عليّ ..

يوم قالت ..ياحبيبي ...
لاتمل هموم حملك ..
ولاتظن الناس مثلك ..
واصنع أمرك من يمينك ..
لاتدور من يعينك ..
بين ربعك .. ولاأهلك ..
لاتعامل باللي تكره ..
ولا تجارم وإلا تشره...
ياحبيبي .. ..
هذي وصايا ..
لاتفرط في بعضها ..
ماتتوه الشمس عينك ..
أو تتوه الأرض رجلك ..
ياحبيبي
ها لامانه
حاول تحمّلها طفلك !!
--------------------------------------------------------------------------------

شكرا لكم على مروركم العطر





تحياتي